Pueblo a kumpli ku Mgr. Amado Römer

WILLEMSTAD – Iglesia Katóliko a ekspresá satisfakshon awe mainta pa e forma ku tur aktividat a kana rondó di e entiero di Mgr. Amado Römer. Tantu parti mainta komo atardi, míles di hende a akudí pa mustra nan tristesa ku morto di e popular pader Yu di Kòrsou.

Ounke e ambiente tabata unu di kalor insoportabel, hopi ta esnan ku a keda te na final for di algu pasá di mitar di 12 ku a hiba e restunan mortal misa di Santa Famia. Tabatin diferente diskurso den kua a elogiá e trabounan valioso ku pader Römer a hasi pa komunidat riba diferente tereno. Remarkabel ta tambe, ku pader Römer tabata den kurason di grandi i chikí i tur gremio di komunidat.

Tele-Kòrsou a hasi un bon trabou ku e transmishon di ayera, ounke tabatin algun remarke krítiko riba e spòtnan ku tabatin durante e transmishon. Prinsipalmente e aviso pa bibida alkohóliko durante e predikashon di Mgr. Luis Secco no a kai den bon tera. Tambe tabatin e remarke ku algun pastor a yega na momentu ku ya kaba tabata hasiendo e parti final di e servisio fúnebre. Na e ruta pa bai santana na Roodeweg tabatin un gran kantidat di hende kant’i kaminda ku tambe a paga atenshon. Un kos ku a hala atenshon den santana tabata, ku e kaha di morto a habri na momentu ku a bai poné na su último lugá di sosiegu.