ORANJESTAD - Minister di Energia, Mike de Meza, kende ta encabesa e negociacionnan pa Gobierno entre ehecutivonan di Valero y PetroChina, a duna di conoce cu e negociacionnan aki a keda reanuda e siman aki.

Cu esaki Minister Mike de Meza a bari tur speculacion cu tin ta circula, y cu ta procedente di partido opositor MEP,  cu ya a bisa, cu no tin solucion mas p’e refineria na Aruba.

Manera ta conoci, na fin di aña pasa, lo ta debi n’e dianan di fiesta, cada un di e partidonan a haya ta bon pa tuma algun dia liber, pero pa keda consulta internamente, pa unabes cu aña habri, bolbe reanuda e deliberacionnan riba e futuro di e refineria na Aruba.

Minister Mike de Meza a confirma cu e negociacionnan aki, por lo pronto ta tumando lugar den conference call. Y tanten cu tin negociacion, Aruba por carga speranza y no ta manera cu tin algun profeta eyfo cu ta manera nan ta pidi pa Valero sera su portanan, pa laga pueblo keda malo.

E no ta facil, pero Mike de Meza ta keda cu masha speranza di por haya un solucion p’e refineria na Aruba, cu de facto no ta propiedad di Gobierno, pero di Valero, cu kende PetroChina mester yega na un acuerdo, pa despues delibera riba e condicionnan cu Gobierno tin cu a ser entrega caba na e.o. PetroChina.

Mike de Meza a duna e impresión, cu no ta PetroChina so ta un di e gruponan interesa, pero cu tin mas, pero no ta etico pa menciona e otro gruponan, y pa duna Valero y PetroChina tur espacio pa sigui negocia.