WILLEMSTAD – Mester bolbe sende e bela k’a paga i urgentemente Kòrsou mester kuminsá bira mas konsiente di su komportashon seksual ku ta kohiendo un rumbo negativo, si analisá e kantidat di malesanan venériko.

GGD próksimamente ta bai lansa un seri di proyekto pa kontrarestá e tendensia kresiente di mal komportashon di prinsipalmente hóbennan riba tereno seksual, sea debí na ignoransia òf persepshon eróneo tambe dirigi riba prinsipalmente hóbennan.
“Tin demasiado hende ku ta tuma rísiko innesesario. GGD ta bai lansa diferente proyekto pa konsientisá kada suidadano riba nan responsabilidat pa un mihó maneho dje bida seksual na Kòrsou,” segun Jeanine Constansia-Kook di GGD.

Segun Constansia-Kook estudionan internashonal hasí pa UNPF  a revelá ku na momentu ku e mama muri den sentido di un malesa venériko i ku e yu a keda na bida inisialmente, hopi biaha e beibi ta fayesé tòg debí na kuido inapropiá i negligensia dje tata of esun ku ta keda enkargá ku kuido di e beibi.
Ademas di partimentu di kondon grátis manera indiká den un otro artíkulo, lo organisá tayernan pa duna mas informashon di komportashon seksual, no solamente na gruponan direktamente inbolbí, pero tambe esnan den un otro sektor ku por tin un relashon den esaki.

“Nos a amplia e parti di konsientisashon i no solamente ta invitá instansianan relevante den salubridat ku tin di haber ku komportashon seksual, pero tambe esnan sekundario manera hustisia i e área sosial,” segun e kolaboradó.
Constansia-Kook ta kere firmemente ku mester duna mas informashon di konsientisashon den komportashon seksual i entre otro mester duna mas splikashon di kiko realmente ta nifikashon i konsekuensia di tene relashon seksual.

“Relashon seksual no tur bes ta enserá amor, loke prinsipalmente ta konfundí e hobensita, dor di kual e ta kai den e trampa di bai kama iresponsablemente ku un hòmber. Mester splika e diferensia entre sèks pashonal i afekshon di amor ku no tin nada di haber ku freimentu.”
Pero mas importante ta pa hasi e konsepto di ‘ABC’ (Apstené, Be faithful/ sea fìel, uso di kondon) mas konosí bou di komunidat, di manera ku kada hende por realisá ku tin alternativa pa skohe for di dje na momentu di tuma desishon.